2025 жылғы 30 қазанда Қазақстан Республикасы Бас прокуратурасының жанындағы Құқық қорғау органдары академиясында Қазақстандағы БҰҰ Есірткі және қылмыс жөніндегі басқармасының Бағдарламалық кеңсесінің басшысы Мадина Сариевамен кездесу өтті.
Кездесу барысында ынтымақтастықтың басым бағыттары мен көпжылдық серіктестіктің қол жеткізілген нәтижелері талқыланды. Академия ректоры Нұрғалым Әбдіров БҰҰ ЕҚББ-мен өзара іс-қимыл жалпы мақсаттарға – заңдылықты нығайтуға, трансұлттық қылмысқа қарсы іс-қимылға және кадрларды даярлауға цифрлық шешімдерді енгізуге құрылатынын атап өтті.
Тараптар бірлескен зерттеулердің перспективаларын, оқыту курстарын құруды және оқытудың инновациялық форматтарын, оның ішінде киберқауіпсіздік, цифрлық криминалистика және тергеуде жасанды интеллектіні қолдану тақырыптарын дамытуды қарастырды.
Кездесу қорытындысы бойынша әріптестікті одан әрі дамытуға және құқық үстемдігін нығайтуға және құқық қорғау органдары қызметкерлерінің кәсіби құзыреттілігін арттыруға бағытталған жаңа бастамаларды іске асыруға дайын екені расталды.
