2025 жылғы 23 қыркүйекте Қазақстан Республикасы Бас прокуратурасының жанындағы Құқық қорғау органдары академиясында ЕҚЫҰ-ның Астана қаласындағы Бағдарламалар офисімен бірлесіп ұйымдастырылған «Ақпарат берушілерді қорғау: ұлттық заңнамаға еуропалық тәжірибені енгізу» атты екі күндік тренинг аяқталды. Іс-шараның мақсаты — қызметкерлердің практикалық дағдыларын нығайту және заң бұзушылық туралы хабарлаған адамдарды қорғаудың заманауи жүйесін дамыту.
Бағдарламаны сыбайлас жемқорлыққа қарсы іс-қимыл жөніндегі халықаралық сарапшы, заң ғылымдарының докторы Раймундас Калесникас жүргізді. Қатысушылар халықаралық стандарттарды, еуропалық елдердің үздік тәжірибелерін, хабарлаушылардың құқықтық мәртебесін, жеке деректерді қорғауды және ішкі хабарлау арналарын енгізуді талқылады.
Тренингте дәрістер, пікірталастар, кейстерді модельдеу болды. Нәтижесінде қатысушылар халықаралық құжаттар туралы білімдерін жүйелендірді, хабарламаларды қабылдау және деректерді қорғау алгоритмдерін пысықтады, ұйымдарда тиімді арналарды енгізу және рөлдерді бөлу бойынша ұсыныстар дайындады.
Мұндай бағдарламалар кәсіби дайындықты күшейтіп, Академияның халықаралық ұйымдармен ынтымақтастығын нығайтады. ЕҚЫҰ-мен серіктестік үздік тәжірибелермен алмасуға және азаматтардың құқықтарын қорғаудың тұрақты жүйесін және мемлекеттік институттардың ашықтығын дамытуға мүмкіндік береді.
