2025 жылғы 4-5 желтоқсанда Қазақстан Республикасының Бас прокуратурасы мен Бас прокуратураның жанындағы Құқық қорғау органдары академиясының ұйымдастыруымен «Заң мен тәртіп – тұрақтылық пен прогрестің негізі» атты халықаралық ғылыми-практикалық конференция өтті.
Жалпы отырысты ашқан Бас Прокурор Берік Асылов «Заң мен тәртіп» идеологиясы мемлекеттік саясаттың басты бағдарына айналғанын атап өтті. Ол құқықтық тәртіпті нығайту мемлекеттік органдардың үйлесімді жұмысы, бірыңғай профилактикалық жүйе құру және басшылардың негізгі көрсеткіштерге қол жеткізу үшін дербес жауапкершілігі жағдайында ғана мүмкін болатынын атап өтті. Ол профилактикалық қызметтің сапасын арттыруға және оның өлшемділігін қамтамасыз етуге мүмкіндік беретін заманауи цифрлық шешімдер мен жобалық тәсілді енгізуді маңызды бағыт ретінде атады.
Жүйелілік пен ғылыми тақырыбын жалғастырған Академия ректоры Нұрғалым Әбдіров құқық саласында бірыңғай ғылыми-сараптамалық кеңістікті қалыптастыру шараларын ұсынды. Ол Академияның үш негізгі әдістемелік құжатты әзірлегенін хабарлады: алдын алудың озық тәжірибелеріне халықаралық шолу, пилоттық жобаларды іске асыру алгоритмі және криминологиялық диагностика әдістемесі, олар стандартталған және ғылыми негізделген жұмыс үшін негіз жасайды.
Сондай-ақ ректор конференция барысында талқыланған мәселелер бойынша қалыптасқан «Заң мен тәртіп» идеологиясын одан әрі дамыту бағыттарын атап өтті. Олардың ішінде:
— профилактиканың тиімді үлгілерін бүкіл ел бойынша таратуға мүмкіндік беретін табысты өңірлік жобаларды («Адал бала,» «Қауіпсіз Тараз», «Sim box», «Карбон», «Цветной маршрут») стандарттау және масштабтау;
— ведомстволық жоғары оқу орындары мен бастамашыл орталықтардың жұмысын үйлестіру үшін ғылыми-білім беру қызметін жетілдіру жөніндегі үйлестіруші және ведомствоаралық құрылымдарды құру;
— нақты нәтижелер мен халықтың сеніміне баса назар аудара отырып, мемлекеттік органдардың профилактика саласындағы қызметін бағалауға KPI жүйесін енгізу;
— цифрлық шешімдер мен ғылыми зерттеулерді кеңейту, оның ішінде «Зерттеуші» порталын пайдалану, аналитиканы, AI-модельдерді және болжау құралдарын қолдану;
— алдын алудың барлық субъектілерінің біліктілігін арттыру, бірыңғай білім беру кеңістігін қалыптастыру және кадрларды даярлаудың икемді модульдік бағдарламаларына көшу;
— қауіпсіз әлеуметтік орта құруға халықты, ҮЕҰ және сарапшылар қауымдастығын тартуға ықпал ететін қоғамдық қатысу және кері байланыс тетіктерін нығайту.
Конференция барысында қатысушылар мектеп оқушыларын цифрлық құқықтық тәрбиелеу, киберқылмысқа қарсы іс-қимыл шаралары, қауіпсіз қалалық ортаны қалыптастыру мәселелері, сондай-ақ құқық қорғау жүйесі үшін жаңа форматтағы мамандарды даярлау тәсілдері бойынша тәжірибе алмасты.
Конференция жұмысы «Заң мен тәртіп» идеологиясын одан әрі дамытуға, ғылыми-талдамалық базаны жетілдіруге және азаматтардың құқықтық тәртіп институттарына деген сенімін нығайтуға бағытталған ұсыныстарды қалыптастырумен аяқталды.
Құқық қорғау органдары
академиясының баспасөз қызметі
Телефон: +7 (701) 512-64-30
Email: 7340104@prokuror.gov.kz
