Бүгін Қазақстан Республикасының Бас прокуратурасы жанындағы Құқық қорғау органдары академиясында Конституциялық Сот судьяларының қатысуымен диалогтық кездесу өтті. Іс-шара Қазақстан Республикасы Конституциясының 30 жылдығына арналған «Ата Заң – Тәуелсіздік тірегі» ұлттық жоспарын іске асыру аясында ұйымдастырылды.
Кездесуді ашқан Бас Прокурордың орынбасары Әсет Шындалиев прокуратура органдары мен Конституциялық Сот арасындағы өзара іс-қимылдың маңыздылығына тоқталып, Сот шешімдерінің орындалуын қамтамасыз ету бойынша атқарылып жатқан жұмыстар туралы айтты. Оның айтуынша, прокуратура конституциялық өндіріс бойынша тұрақты түрде қорытындылар беріп, ондаған оқыту іс-шараларын ұйымдастырып, мемлекеттік органдарға прокурорлық қадағалау актілерін енгізуде.
Конституциялық Сот Төрағасының орынбасары Бақыт Нұрмұханов өз сөзінде Соттың конституциялық заңдылықты нығайтудағы және азаматтардың құқықтары мен бостандықтарын қорғаудағы рөліне тоқталды. Ол сот пен білім беру саласының арасындағы диалогтың маңыздылығын атап өтіп, Соттың кәсіби және ғылыми ынтымақтастыққа ашық екенін жеткізді.
Академия ректоры Марат Сексембаев кездесуге қатысушыларға Академияның негізгі бағыттары мен қызметінің нәтижелерін таныстырып, болашақ қызметкерлерге арналған алғашқы кәсіби даярлық жүйесі туралы жан-жақты баяндады. Сонымен қатар, қолданыстағы қызметкерлердің біліктілігін арттыру, магистратура мен докторантура бағдарламаларын дамыту, халықаралық ынтымақтастық мәселелері қозғалды. Оқу орнының басшысы сондай-ақ Академия базасында жүзеге асырылып жатқан ғылыми зерттеулердің нәтижелерімен таныстырды.
Конституциялық Соттың судьясы Роман Подопригора Соттың жекелеген шешімдерін қолдану тәжірибесі туралы баяндама жасады, ал Сот Аппараты басшысының орынбасары Ерлан Сапаров қорытынды қаулыларды іске асыру тетіктері мен мемлекеттік органдармен өзара іс-қимыл туралы айтты.
Кездесу соңында қонақтарға Академияның оқу базасы – арнайы жабдықталған кабинеттер, киберорталық және оқу полигондары таныстырылды.
Құқық қорғау органдары
академиясының баспасөз қызметі
Телефон: +7 (778) 615-41-81
Email: 7171498@prokuror.kz
