2024 жылғы 21-23 ақпан аралығында Құқық қорғау органдары академиясы Біріккен Ұлттар Ұйымының Есірткі және қылмыс жөніндегі басқармасымен (БҰҰ ЕҚБ) бірлесіп ақшаны жылыстатуға және терроризмді қаржыландыруға қарсы іс-қимыл (АЖ/ТҚҚ) бойынша ұлттық жаттықтырушыларға арналған практикалық тренинг ұйымдастырды. Тренинг Radisson Hotel Astana қонақ үйінде өтті және оған Қазақстанның құқық қорғау органдары мен қаржы институттарының өкілдері қатысты.
Тренингтің мақсаты параллельді қаржылық тергеулер бойынша тиімді және интерактивті сабақтар өткізуге қабілетті білікті жаттықтырушыларды даярлау болды. Параллельді қаржылық тергеу – бұл бір субъектіге немесе субъектілер тобына қатысты қылмыстық және қаржылық тергеуді бір уақытта жүргізуді көздейтін АЖ/ТҚҚ-мен күрестегі негізгі құралдардың бірі.
Қатысушылар АЖ/ТҚҚ саласындағы тренингтерді әзірлеу, дайындау және өткізудің негізгі принциптері мен әдістерін, сондай-ақ тренингтерді дайындау және жоспарлау бойынша БҰҰ ЕҚБ әдіснамасын зерделеді. Олар сондай-ақ аудиторияны басқару, визуалды құралдарды пайдалану, уақытты басқару және стратегиялық жоспарлау бойынша практикалық дағдыларға ие болды.
Сонымен қатар қатысушылар параллельді қаржылық тергеулер бойынша халықаралық және Ұлттық Стандарттармен және ұсынымдармен, сондай-ақ осы саладағы шетелдік сарапшылардың үздік практикаларымен және тәжірибелерімен танысты.
Тренингке топтық практикалық жұмыс кірді, онда қатысушылар параллельді қаржылық тергеулермен байланысты мәселелерді шешіп, нақты жағдайларды талдап, мүмкін стратегиялар мен тактикаларды талқылады. Бұл оларға қаржылық тергеудің күрделілігі мен ерекшеліктері туралы түсініктерін тереңдетуге, сондай-ақ кәсіби құзыреттерін дамытуға мүмкіндік берді.
Тренинг АЖ/ТҚҚ бойынша ұлттық жаттықтырушыларды даярлаудың бірінші кезеңі болды, ол 2024 жылға дейін жалғасады. Келесі кезеңдер шеңберінде қатысушылар АЖ/ТҚҚ-ның әртүрлі аспектілері бойынша қосымша модульдерден өтеді, сондай-ақ әріптестер мен серіктестер үшін өздерінің тренингтерін өткізеді.
Құқық қорғау органдары академиясының
баспасөз қызметі
